زبالتنا وزبالة تورينتو

عم يخبرني صديق ساكن بكندا وبالتحديد بمدينة تورينتو إنو الزبالين عندون مأضربين. وما حدا منون عم يمر يلم الزبالة. وهالبلد تعبت زبالة لفوق ما تتصور. يعني بدك تقول وين ما بتطلع بتلاقي زبالة مكومة. الحاويات مليانة وفايضة والزبالة مكدسة تكديس فيها وما حدا عم من الزبالين عم يقوم بعملو اليومي ويلم الزبالة لا الزباليين اللي بقشو الطرقات ولا الزبالين اللي مدللين أكتر وبيركبو شاحنات نقل الزبالة. اللي إلها قلاب أكيد عرفتوها؟؟ واللي ما عرفها هيي متل السيارات تبع الزبالة اللي بتجي بالليل عنا وبتفيقك بصوتها وبصوت الحاوية لما بدجوها دج وهني عم يفضوها ولما بنزلوها وبرجعوها محلها! طبعاً ما في احتمال إنو ترجع محل ما كانت مية بالمية أكيد. بتعرف احتمال الخطأ وارد وما فيها شي إذا فرقت خمس متار كل يوم وبعد شي شهر بتلاقيها صارت بالحارة التانية.. إي ما علينا.. عرفتها لهالسيارة؟؟ إي منيح
وليش يا ترى هالإضراب؟؟ على حسب ما قال هالصديق إنو عمال الزبالة خطي حاسين بالظلم يعني واحدون بياخد على الساعة 36 دولار بس
وبيشتغلو أكتر من 16 ساعة باليوم طبعاً كل ساعة أوفرتايم بياخدوها طاق ونص يعني بدك تزيد 18 دولار زيادة على كل ساعة أوفر تايم.
وشيت إنو ما عم يحسنو ياخدو إجازات عم يقبضو محلها مصاري وبيطلعلون بس 18 يوم إجازة بالسنة بس لإنو في زبالة كتير متل ما بتعرفو والزبالين قلال. فما عم يحسنو ياخدو إجازات والشغل عليهون نازل سفق بسفق. فلقو حالون عم يشتغلو 20 سنة وما عم يطلعلون من العشرين سنة غير سنة وحدة مقبوضة بدون عمل ( يعني الإجازات كلها ) فهالشباب الطيبة قررو يبطلو يلمو زبالة وخليها تنفعو لمحافظ تورينتو
إذا ما ظبطولون أحوالون يعني خلص رح تصير تورينتو مستنقع زبالة.
وهو عم يحكيلي هالشي صديقي. قرر يتحفني كمان ببعض الصور اللي مصورينها الصحافة ومنزلينها على الإنترنت هون وهون وطبعاً كتير صور. بصراحة أنا استمتعت بهالصور. يعني الواحد يقول ضميرو . إي هي زبالة وزبالتنا زبالة؟؟؟ والله شي بيفتح القابلية على إنو الواحد يشتغل زبال بتورينتو.. يا أخي زبالتون كلها ألوان شي أحمر وشي أصفر وشي أخضر. تقول فنانين بالزبالة؟؟؟!! تعال شوف زبالتنا هون يا دوب بتطلع لونين.. كياس نايلون مخزقة أو قشور لشغلات ما حدا بيعرف شو كانت بالأصل. يعني ما فينك تقول لا خيار ولا بندورة ولا حتى إي نوع من أنواع النباتات. الله وكيلك في عنا متل ما بتعرفو لمامين زبالة هون (هدول غير الزبالين) هدول اللي بلفو الزبالة تفلاية وبجهزوها للزبالين حتى يستلموها على الجاهز مفلترة على الأصول. كل واحد منون بتلاقيه ناتع سحارة على هالبسكليت ويالله من حاوية لحاوية ومن زاوية لزاوية وهات فلشلي هالكيس ونكشلي هالكومات. ومتخصصين بكل أنواع المواد اللي ممكن تتحول لمصادر ممتازة للصناعة من خشب وحديد وغيره. طبعاً هدول ما نون موظفين عند الدولة متل الزبالين اللي بيجو بآخر النهار. فما تخافو ما رح يجي يوم ويأضربو متل زبالين تورينتو. يعني حتى لو ضلينا بلا زبالين لشهر ما رح تلحق تتعبى الحاويات. ويخزي العين بهمة هالشباب الفلترجية واللي بيعرفو كيف بطلعو اللي بيسوا من اللي ما بيسوا بدقيقة. بعلمك بكون عم ينكش بالحاوية حد بيتك وبلحظة بكون صار بآخر الشارع عن الحاوية اللي بعدها .. معلوم خبرة سنوات. بدوهون كتير الزبالة الكنديين تحتى يتعلموها هالشغلة. وقال مأضربين قال. يعني مأصرين ومأنبرين. وهاد غير إنو عندون تياب نظيفة وسيارات غير شكل وحتى مقشات بتشتغل على البطارية وشفط الهوا وهاد غير الحاويات اللي بتلاقيها أنظف من سيارة الإسعاف. عنجد ما معون حق يأضربو... لك تضربو انشاء الله من بين الزبالين. قال مأضربين قال.
هلق يا حرام المواطينين بتورينتو مانون عرفانين وين بدون يروحو بهالزبالة وصارت شغلتون عويصة.
عم فكر روح على السفارة الكندية اقنعون بلكي بيبعتولون فيز لهدول الفلترجية اللي عنا أكيد بيفيزولون دغري على هالخبرة اللي عندون وبحلولون أزمة الزبالة.. ... شو رأيك ؟!

صارت وصارت

- إنو جاي تحتى تسألني وتاخد برأيي؟ عم تقلي جاييتك فرصة وعم تسأل هالناس حواليك. إنو تروح ولا ما تروح.!!؟ تقدم على هالعرض ولا ما اتقدم؟!!.. هيي بينك وبين حالك فرصة يا أخي شو بدك بالحكي.. فرصة ويمكن ما بتجي مرتين.
أكيد إذا رح اضلك تسألني وتسأل فلان وفلانة وعلتان وعلتانة ما رح اضلها فرصة. يمكن تتحول لشي تاني. بس بأكدلك إنو رح تتحول لشي متل الجرصة. لذلك خليها براسك بس. أكتر من راسك ما تخليها تطلع.
يمكن إنت محتار وبعدك لهلق مانك متأكد شو تاخد قرار. بس ما تنسى إنك صرلك سنين قاعد ما عم تعمل شي. لا قدمت 1 سم للأمام ولا رجعت 1 سم لورا. بعدني بشوفك كل مرة ويمكن من أكتر من 10 سنين محلك. بنفس الميلي متر المربع اللي مربعينك عليه. يا أخي حتى المربع اللي تحتك مل وزهق منك. ويمكن متل ما عم اسمع إنو خلصت مدة الصلاحية تبعو وصار لازملك تغيرو. بس متل ما بعرفك ما بتحب التغيير. بتتنكرز من هالكلمة. شايلها أصلا حضرة جنابك من قاموس المحيط حولك. هاد إذا بعد فينا نقول عنو قاموس. يمكن ما بقي فيو أربع صفحات على بعضهون. وعلى الأغلب هاد قاموسك خلقة جاي صغير وعلى قدك.. وما في عندك نية بالأساس تعمل شي بخصوصو. مش بس بخصوص القاموس. بخصوص كل شي فيك وحواليك. وبما إنك على هالحالة. أكيد هالعرض اللي إجاك فرصة ما بدها اتنين يحكو فيها. خلص روح وقدم يا أخي. لك قدملك لللأمام شي خطوة. خنقتنا معك
- راح وفكر وبعد يومين رجع يقلي: شايف بما إنو صارت وصارت. رح قدم.!!

دقيقة الموبايل

اليوم وصلني إيميل عم يدعوني فيه لوقع على عريضة إلكترونية رح تتقدم متل ما عم يحكو هالشباب الطيبة اللي عاملينها، لوزير الاتصالات عم يطالبو فيها تخفيض سعر دقيقة الموبايل. والله شي حلو. إنو عنجد شي مفخرة. شوفو وين رايحين شوفو!
والله هالشبيبة مبسوطين إنو عم يوقعو يا أخي وعم تطول هالعريضة الإلكترونية ويمكن لو بصحلون يبصمو كمان إلكترونياً ما بقصرو
إنو خلصت كل الإشيا المتعسرة وانحلت وكل شي ناقصنا هو بس تخفيض إجرة دقيقة الخليوي!!؟؟؟ يالله ما أحلى الدنيا وما أهناها
إنو هالأدب اللي اخترعناه احنا وغيرنا من الدول العربية واللي اسمو أدب المسجات بالموبايل لازم ندعمو أكتر وندعم الحكي الفاضي والتعليك الموجهن اللي عم نبعتو لبعضنا بكل مناسبة وبكل ما دق الكوز بالجرة منروح مندور على شي مسج مبتكرة وابعات لشوف وشغلي البلوتوث وعطيني شو عندك مسجات تناسب هالمناسبة كل هالأدب الميتاإلكتروني هاد . لازم ندعمو ونطالب الوزير يخفضلنا سعر الدقيقة والتكلفة حتى نبدع أكتر ونعلك أكتر ونتوجهن أكتر وأكتر. طبعاً ما تنسولي هدول المسجات اللي بتروح للقنوات الفضائية وبتمر متل السهم مدعومة بوجوه ضاحكة وباكية وقلوب مفجوعة وخافقة. بتمر شي تحت الشاشة وشي بنص الشاشة وشي فوق وشي تحت.
إنو عيب يا سعادة الوزير . إنتي مانك مودرن وأكيد ما بدك تخلينا نستمتع بتضييع وقتنا الثمين هاد إذا ضل في شي ثمين عنا.
وبعدين بدكون تقولولي مين عم يستخدم الموبايل يعني؟؟ ما إحنا سجلنا رقم قياسي عالمياً بعدد المسد كولز "التعليم" يمكن حتى نسينا بالأصل معنى كلمة تعليم الأصلية شو كانت بالأصل... يمكن لازم يزعل وزير التربية والتعليم لاستعارتنا هالكلمة واسحواذها بشكل كامل لصالح الخليوي.
هلق بدك تقلي إنو احنا منعلم لإنو الحكي على الموبايل غالي. بدك تعذرني وتسمعني منيح لما قلك هالحكي مو صحيح أبداً..
ما إحنا شو منحكي ليش؟ ألو مرحباً كيفك شو أخبارك. شو في ما في؟ أول خمس دقايق كلها نفس الشي حكي فاضي كمان وما منعرف نصيغ جملة سليمة مفيدة ودغري. دايما منكرر ومنكرر ومنعيد بدون ما نحكي شي مفيد... قلي هالحكي مو صح؟ بزعل منك
فأكيد بدك تنفلج لما تطلع فاتورة موبايلك يا هما لالي. وأكيد رح تخلص الوحدات اللي ما صرلك معبيها الصبح. لذلك بتقضي بقية الشهر وبقية أيام الصلاحية عم تعلم ويعلمولك... صح يا رجال؟؟؟

مو لازم أول نتلعم كيف منحكي أول؟ بعدين منجيب هالتكنولوجيا!!؟؟

بعدين إنو صعبة تحكي على التلفون الأرضي؟؟ كون أكيد إنو وين ما رحت في تلفونات أرضية وكل بيت فيو تلفون واتنين وتلاتة كمان
يعني ضروري الموبايل؟ ما هو بالأساس للشي الضروري ومن الأماكن اللي بتكون فيها مقطوع وصعب تلاقي خط أرضي وبالأساس حتى لو استخدمتو بكون لكلمتين مقتضبتين وليقضي الحاجة المرادة. مو للعلك الفاضي. يعني هاد الشي مطبق بالبلدان اللي دخلها عالي هيك ما بيستخدمو الخليوي غير للضرورة. هلق بدك تنقز لما تسمع هالحكي؟ إي هالحكي صحيح بكل البلدان اللي دخلها عالي وسعر الدقيقة تبع الخليوي منخفضة بالنسبة للدخل وبشكل عام . ما بستخدمو الموبايل غير للضرورة وبيحكو دغري بالموضوع اللي متصلين وشانو. بالأصل ما عندون جوجقة وكولكة وتوجهن ولا عندون أدب المسجات اللي اخترعناه احنا واخوانا العرب

فعلى شو معترضين وعاملين عريضة؟؟ هاد بدل ما تستحو من حالكون ؟؟؟ خلصتو كل المشاكل اللي عندكون حليتوها تماماً
وما بقي عندكون غير العلك الفاضي تعترضو عليه وتعملو عريضة إلكترونية؟؟؟
ما ني مستغرب أبداً . ما إحنا ما منعرف نستخدم التكنولوجيا الإلكترونية غير للعلك الفاضي بالأصل.
طبعاً ما بدي احكي عن الأجهزة الخليوية اللي كل ما نزل جهاز على السوق جديد منشردأ وبتشط ريالتنا وبيصير اللي اشتريناه الشهر الماضي كخا ومنقعد نحسب حساب كيف بدنا نشتري الجديد حتى لو سعرو غالي واوا... هاد مين بدو يعمل اعتراض عليه كمان؟
ما بدكون عريضة إلكترونية لتخفيض أسعار الموبايلات حتى تصير تلبي حاجتنا وشطة ريالنا المتكررة نحو الميزات التكنولوجية. الواحد فينا بدو كل شي يكون موجود بموبايلو وحتى مصنعي الأجهزة فهمونا وصارو يعرفو كيف يعملو أجهزة خصوصي إلنا ولمطالبنا وعرفو كيف يمصو دمنا بهالطريقة . ما حدا سأل حالو ليش هالسلعة اللي اسمها موبايل بينخفض سعرها بشكل خيالي وبتخسر كتير على الرغم من إنو الطلب عليها أكتر من طلبنا للأوكسجين وللمي؟؟؟

بالأحرى لازم نطالب برفع سعر الدقيقة وفرض ضريبة عالية على هالعلك الفاضي اللي نازلين فيو خفق

واللي بدو يزعر يزعل ما هو الحق دايماً بزعل.

بالتزكية

اليوم يا صاحبي نزلت مشوار. يعني بدك تقول تمشاية على الخفيف بهالسوق. متل العادة بالصيفية الناس فايعة بهالشوارع هربانة من هالشوب. بدك تقول تسعين بالمية طالعين هيك مشوار متلي وما عندون شغلة يعملوها. والعشرة بالمية مقسومين شي ببيتو
وشي بكون صاحب محل أو بقالية. وهدول الله يعينون. عنجد الله يعينو اللي عندو محل بدو يلتزم بالشغل كل النهار وما رح يحسن حتى يفكر يطلع هيك متل هالتسعين بالمية الباقيين.
لفت نظري اليوم بأحد هالمحلات عبارة مكتوبة بالخط النبطي مدري الفرعوني مدري الديواني... هيك شي
بتبلش بـ يا رب اشرح صدري و...... (مو مبين الباقي لإنو في رفوف بالوجه) وبتنهي بس بأرحم الراحمين
طبعاً مشهورة العبارة وعلى الأكيد حضرة جنابك بتعرفها. وأنا قاريها كتير بس اللي لفت نظري انها بتنتهي بأرحم الراحمين..
إنو مين هدول الراحمين؟؟؟ ليش في بعد حدا عم يرحم حدا يا صاحبي؟ التسعين بالمية اللي نازلين وفايعين متل النحل يا أخي ما عم يرحمو بعض بنص عجقة هالسوق والسيارات ما عم ترحم اللي عم يقطع الشارع واللي ماسكة ابنها وعم تشد فيو وراها تقول رح تنقطع إيدو ما عم ترحم هالطفل اللي خطواتو ياااا دوب عم تلحق سرعة كعب كندرتها... وهاللي ماشي وعم يصرخ وهو عم يحكي على الموبايل .. إنو ما إنت عم تحكيه للي عم يحكيك بإدنو لك بنص طبلة إدنو هاد إذا ما كان سمعانك كمان منغير الموبايل على قد ما صوتك معبي الشارع. يا أخي ارحام الإخوة المارين وارحام حالك ما يطقلك شي عرق.. إنو بهدول اللي هني تسعين بالمية ما في "الراحمين" لكن معقول يكونوا من العشرة بالمية الباقيين؟؟؟ ما بظن لإنو هدول اللي باقيين ببيوتون ما رحمو حدا لحتى التسعين بالمية هربو وفاعو بهالشوارع
واللي فاتحين محلات نازلين هبر بالأسعار وبالزباين فما بظنلك يا صاحبي إنو في بيناتون هدول "الراحمين"
معناها إذا الراحمين ما عم نلاقيهون فكيف بدك نلاقي أرحم واحد فيهون...
هلق بدك تقلي استغفر الله بعرفك.. وإنو أرحم الراحمين هو "الله " بس بدك تشلي هالعبارة لكن لإنو هيك بكون أرحم الراحمين بالتزكية بدون منافسين. ولا كييييف ؟

خطر على بالك

- كيف خطر على بالك هالشي؟
- يا أخي ما بعرف كيف. هيك خطر ومشي حالو. وعنجد ما بعرف كيف خطر..
إنو إيمتى وكيف.. حتى لأي درجة من درجات الخطر ما بعرف..
ما بعرف بالأساس إنو الموضوع خطر لهالدرجة يعني. عنجد عم تحكيني... إنو الموضوع خطر على البال ؟؟..
قولك يعني هلق بالي صار بوضع حرج؟ وفي خطر عليه؟
لعمى!! ....
- خلص ما بينفعك شي... لازم تتخلص منو بأي شكل. أحسنلك وأحسن لبالك
- معك حق. من اليوم رح اعتبرو مو موجود بالأصل ورح احذفوه نهائياً.. لبالي!!

شو الأخبار ؟

شو الأخبار؟
كلون بيسألوك عن الأخبار ... شو أخبارك شو في ما في؟
مبرمجين وحياتك على هالجملة.. صارت بدك تقول افتتاحية الكلام.. مقدمة المقدمات .. وقبل فنجان القهوة وبعد فنجان القهوة
حتى لو شافوك كل نص ساعة رح يرجعو يسألوك ... شو الأخبار؟؟؟
عنجد شي حلو... كل هالقد الناس بتحبك؟؟ إنو كل ما غبت لحظة ورجعت بيرجعو بيسألوك عن أخبارك؟؟
متوقعين يصير عندك كل لحظة خبر جديد...!!! يمكن
بس متل ما بعرف
ومتل ما عم اسمعك عم ترد كل مرة
" والله ما في شي ... عم اندفش...."

يا أنا يا أنا أنا وياك

من على الصبح ومتل كل صبح
بسمع فيروز...


يمكن بدك تقلي إنو صارت شغلة عادية إنو الكل بقلك بيسمع فيروز وأحلى شي تسمعها الصبح..
لإنو الناس يا أخي بتعرف أحلى شي من كل شي
وكل شي عندون محكوم مسبقاً بفعل التفضيل أفعل متبوعا بالكلمة السحرية "شي"

أحسن شي
أحلى شي
أكتر شي
أطيب شي وأرخص شي
وأسهل شي طبعاً هو أفضل شي من كل شي
بينما أصعب شي فهو مكروه وما حدا بيمشي فيه

الغنية اليوم كانت عم تقلي يا أنا يا أنا أنا وياك
صرنا القصص الغريبة
يا أنا يا أنا أنا وياك
وانسرقت مكاتيبي
وعرفوا انك حبيبي

يا الله شو صارت قصصنا غريبة والله معها حق بهالحكي
مو غريبة ؟ عنجد غريبة...

أما مكاتيبنا فمن زمااااااااااااااان انسرقت يمكن من قبل ما نخلق
بس أنا ماني زعلان انها انسرقت
ما احنا ما عم نكتب شي وهالمكاتيب اللي عم تحكي عليهون أكيد مليون بالمية ما احنا كتبناهون
فليش تحتى نزعل إذا انسرقوا
يعني يمكن صرلنا من وقت ما حرقوا كتب ابن رشد ما كتبنا شي
وهلق الموضة صارت إيميلات وهيك مكاتيب ما بتنحرق

أو بتنحرق؟؟؟
ما بعرف والله

خلينا لكن نسمع الغنية ..